Samtíðar listakvinnur - fyrilestur við Lisbeth Bonde
/Myndin er eitt steinprent hjá Kathrine Ærtebjerg, sum verður við á framsýningini Grafisk Sambond í Norðurlandahúsinum 24.oktober.
Mikukvøldið 16. september kl. 19:30 verður fyrilestur í Listasavni Føroya.
Tey seinnu árini er tað vorðið alt meira alment viðurkent, at kvinnulig listafólk hava latið, og í størri mun lata, týðandi íkast til listasøguna á sama stigi sum menninir. Tær báðar framsýningaraktuellu listakvinnurnar, Júlíana Sveinsdóttir og Ruth Smith, eru framúr góð dømi um hetta. Kortini eru kvinnuligu samtíðarlistafólkini framvegis langt minni sjónlig í flestu framsýningarhølum og -skráum enn teirra mannligu starvsfelagar, hóast fleiri kvinnur enn menn í dag leita sær inn á akademiini. Haraftrat verða fleiri verk eftir kvinnur enn menn tikin við á sensureraðar framsýningar, har listafólkini senda inn ónevnd. Tíbetur eru støðugt fleiri listakvinnur á veg fram.
Fyrilesturin er um nakrar av teimum mest áhugaverdu listakvinnurnar úr Føroyum og Danmark. Fleiri av teimum arbeiða við nýggjum miðlum ella ganga nýggjar leiðir við kendum miðlum, og fleiri av teimum hava sett sjøtil á eina altjóða yrkisleið.
Listakvinnurnar úr Føroyum eru Rannvá Kunoy og Hansina Iversen og úr Danmark Kirstine Roepstorff, Kathrine Ærtebjerg, Ann Lislegaard, Tove Storch, Randi & Katrine og Lilibeth Cuenca Rasmus.
Savnið letur upp kl. 19.
Frá framsýning hjá Rannvá Kunoy í Sveis