Thomas Arge á Listasavni Føroya
/Thomas Arge á Listasavni Føroya
6. februar - 6. apríl 2015
Fríggjadagin tann 6. februar kl. 16:00 letur framsýning upp á Listasavni Føroya við verkum hjá dugnaliga listamanninum Thomasi Arge (1942-78). Hetta er ein afturlítandi framsýning við meira enn 45 útvaldum verkum, sum fyri tað mesta eru lænt frá privatum ognarum bæði í Føroyum og í Danmark.
Hóast sítt stutta lív stendur Thomas Arge sum tann størsti málarin í sínum ættarliði.
Hann var tann fyrsti, ið førdi hagan inn í føroysku listina, men eisini listaliga gekk hann sínar egnu vegir. Soleiðis javnviga málningarnir hjá Thomasi Arge millum tað livandi og sakliga - og millum veruleika og hugflog. Hansara list hevur tí eina serliga hugbindingarmegi, sum í hansara bestu verkum setur hann á altjóða støði.