List til gerandis- og veitslubrúk
/
Listaupplivingar kunnu vera góðar og ringar, tað kann vera veldugt at fara til eina listaframsýning ella film ella sjónleik, tónleik ella lesa eina nýggja bók á fyrsta sinni, men millum mínar bestu listaupplivingar eru tær óvæntaðu. Tær, sum stinga seg upp í gerandisdegnum, tá eg gangi ymsastaðni í býnum, arbeiðsplássinum ella hvar tað kann vera. Í gjár var ein góður dagur í so máta. Eg spákaði mær gjøgnum eina heystliga Havn, regngráa við lýsandi gulum bløðum og inni í Steinprenti helt tað gula fram í prentunum hjá Zven Balslev og John Kørner og í herligu skallamyndini hjá Hanna Bjartalíð, sum minnir meg á deyðan og at lívið er ein glæsilig veitsla, sum eg eri boðin við í. Tóroddur Poulsen hevur málað nakrar fínar vatnlitamyndir, tað eru tostatrø av ymiskum slagi, eitt grindatostatræ við blóðfargaðum havi. Uppiá hongur ein spildurnýggj framúrskarandi mynd hjá Julie Sass, sum tekur abstraktión upp á eitt hægri støði. Eg gangi løtu seinni inn á gólvið í Bank Nordik – har hava tey fingið tvær stórslignar myndir í kantinuna at hanga, ta einu málaði Hansina Iversen. Tá eg komi niðan í Hoydalar hevur mín yndisgrafittiskrivari sett heilar 3 lepar upp á einum útvaldum stað og har er nógv at lesa og at hugsa um. Í morgin letur Bank Nordik upp fyri almenninginum og leygardagin letur Heystframsýningin upp á Skipasmiðjuni, so nógv er at gleða seg til umframt ta góðu gerandislistina.
Grindatostatræ
Julie Sass
Tóroddur Poulsen
Hansina IVersen
John Kørner gjørdi hesi bæði prentini við tveimum føroyingum
Flotta plakatin, sum Tróndur Patursson gjørdi til heystframsýningina
Grafitti í Hoydølum
Tað er Fríða Matras Brekku, sum hevur broderað og sett saman nøkur verk í Steinprenti