Listaboykottið er av
/Frá mótmælistiltaki við grillaðum pylsum í Sandagerði
Listaboykottið byrjaði 2.november 2012, tá Sunleif Rasmussen og ein samdur Teitur Lassen mæltu øllum listafólkum við sjálvsvirðing um at boykotta øll tiltøk, sum almennu Føroyar standa fyri til tess at mótmæla teim skerjingum, sum tá vóru framdar móti íløgum landsins í mentan og list. Sunleif Rasmussen og Teitur Lassen, ið byrjaðu listaboykottið, eru nú vorðnir samdir um at avlýsa tað. Hetta kemst ikki av tí, at mentamálaráðharrin hevur gjørt nakað fyri, at seta pengarnar inn aftur í Mentanargrunnin, greiða teir frá og halda fram: “Og tað nýggjasta er at hann hevur hildið grunnin Fjølrit sum gísla, tí hann vil hava at grunnurin skal gjalda administratiónina av nýggju upphavsrættslógini. Men vit avlýsa, tí at boykottið liggur og svevur í so leingi, og so koma onkrir fyrispurningar, og vit siga at boykottið er framvegis galdandi. Vit eru komnir til ta avgerð, at best er at avlýsa, men ásanna samstundis, at hetta er kanska størsta boykott nakrantíð. Ikki bert í Føroyum, men størsta listaboykott nakrastaðni. Og við hesum vilja vit vísa á, at sjálvt um føroysk listafólk liva undir ósømiligum korum, finna vit okkum ikki í øllum. Og hetta skal vera eitt týðiligt signal til maktina, at um nakað tílíkt hendir aftur, verður eitt boykott nógv meir umfatandi. At enda vilja vit takka øllum, ið hava luttikið í listaboykottinum, og víst dirvi at peika á botnleysa órættin, sum vit listafólk hava verið fyri.”