Mentunarvirðislønir Landsins
/
Mentunarvirðislønir Landsins vórðu handaðar í Deplinum í Skálavík í dag og aftur í ár var Páll Danielsen vertur. Landsstýrismaðurin legði fyri og síðan sang Birita Poulsen Du bist die ruhe hjá Schubert, Mattias Kapnas spældi klaver og tað var hann, sum fekk virðislønina til ungt listafólk 2014. Tað fekk hann fyri at vera evnaríkur, íðin og djarvur tónleikari og ein sannur úrmælingur á klaverinum. Mattias Kapnas takkaði í einari røðu, har hann m.a. greiddi frá, at komandi tíðin fer at vera krevjandi hjá honum. Hann takkaði eisini lærarum sínum á Musikkskúlanum, bólkinum Bendar Spónir og føroyska mentanarumhvørvinum, sum hann segði seg vera errin av at vera partur av. Síðani kvitteraði hann við at spæla ta máttmiklu sonatuna hjá Beethoven Appasionata. Jóhannes Andreasen helt eina røðu fyri sínum fyrrverandi næmingi.
Sømdargávur Landsins vórðu síðani latnar. Í ár eru tað tvær listakvinnur, sum fáa lívslongu sømdargávu landsins, tær eru Oddvør Johansen og Katrin Ottarsdóttir. Síðstnevnda var rørd og takksom og helt eina røðu, sum endaði við eini stuttligari anekdotu um Daells og Dal.
Heiðursgávu Landsins fekk bólkurin Tey av Kamarinum, sum í dag bara eru "Tvey av Kamarinum" og Eyðbjørn av Kamarinum helt takkarrøðuna og greiddi frá hvussu tey byrjaðu. Síðani hugleiddi ein rørdur Birgir Kruse um seriøsan og óseriøsan tónleik og honum á baki trinu tvey á kamarinum á pallin at syngja og spæla. Mentunarvirðisløn Landsins fyri 2014 varð latin Torbirni Olsen, sum helt eina takkarrøðu og at enda helt Hansina Iversen eina áhugaverda røðu um listina hjá Torbirni Olsen. Hjartaliga til lukku øll somul!