Í postkassanum fann eg í áðni eitt hefti, sum eg fyrst helt vera eina reklamu (fái ikki nógvan annan post), men áskriftin Túsundáraritið segði mær, at talan var um aðra sjangru enn reklamu og eg skilji á google, at Túsundáraritið er eitt listablað við 200 hondnummereraðum eintøkum. Eg havi blaðað í mínum eintaki, sum er nummar 136 og er ein poetisk kollasja við umskarandi myndum av øllum møguligum slag og setningum, sum kunnu hava samband ella ikki við myndatilfarið.
Róð verður fram undir ymsar samanhangir, ið tó ikki verða forkláraðir. Kanska kunnu myndirnar lýsast sum estetiskt øvugtar av teimum náttúruyndisligu fotomyndunum, vit eru von við frá Instagram og ferðafólkaídnaðinum. Dentur tykist vera lagdur á underground, grafitti og órudd, men so er eisini ein ordiliga flott yacht í rokanum - hon siglur onkrastaðni í suðurlondum við órógvandi tekstinum Hví eri eg her? Tingini verða vend við og fremmandgjørd, meðan óruddið hinvegin fær virði og meining eins og eykalutir, ið skulu brúkast seinni. Miðskeiðis í heftinum er ein sosialrealistisk/humoristisk myndafrásøgn/viðtal um ein, sum býr í húsvogni. Útgávutiltak verður í Gallarí Havnará í morgin 24.mai klokkan 17. Gjørt ritið hava Gwenaël Akira Helmsdal Carré og Sigmund V.P.Zachariassen.
