Gløgg list í Steinprenti

Hanni Bjartalíð tekning

Fríggjadagin 9.desember klokkan 16 letur Myndaódnin 2022 upp í Steinprenti. Fyrsta framsýning av hesum slagi var í Steinprenti í 2009 og síðani hevur hon verið á hvørjum ári sæð burtur frá onkrum einstøkum koronufráviki. Framsýningin við verkum eftir fimtan listafólk tekur saman um nógva virksemið, sum hevur verið í Steinprenti í brátt farna ári og sum mann kann njóta afturvið einum glasi av flógvum gløggi.

Litografiskur steinur við mynd hjá Julie Sass

Abstrakt prent

Á framsýningini í ár verður eitt gott bland av føroyskum og donskum listafólkum. Nýggjastu verkini á framsýningini eru tey hjá donsku listakvinnuni Julie Sass, sum júst hevur gjørt fýra abstrakt heliografi/steinprent á verkstaðnum, ið tykjast merkiliga løtt og ómakaleys samstundis sum bygnaðurin er samansettur og kompleksur. Hansina Iversen gjørdi fyrr í ár eina heila røð av steinprentum, sum eisini eru abstrakt. Hansina er málari og grafikari, ið eftirhondini er sera roynd innan steinprentstøknið. Royndirnar geva henni dirvi til at komponera at síggja til fløktar myndaflatur, ið eru so fullar av øllum møguligum formum, at tú ivast um myndaflatin ikki fer at bresta Men tá myndin er liðug, hendir tað løgna, at strok og fleiri løg av glógvandi litum at síggja til tvinnast saman til avkláraðar kompositiónir, ið innihalda orku og ró.

Hansina Iversen

Zacharias Heinesen

Steinbrá gávuprent

Zacharias Heinesen hevur gjørt ársins gávuprent. Gávuprent eru ókeypis prentmyndir, sum grafikkfelagið Steinbrá letur limum sínum um jóltíðir. Limir og øll, sum hava hug at blíva limir – tað kostar 500 kr um árið fyri einstaklingar og 2000 fyri fyritøkur – kunnu á hvørjum árið kjósa sær eitt prent av fýra møguligum. Steinbrá er stuðulsfelag hjá Steinprent og í Steinprenti hevur ein rúgva av fólki verið eftir gávuprentum og tað gleðast tey um í Steinprenti. Myndirnar hjá Zachariasi minna um hansara klassisku tulkingar av føroyska umhvørvinum í bygd og bý, ið trína fram við klárum myrkabláum konturstrikum. Litavalið er pastel ella bommlitt við glógvandi gulum, ljósaviolettum, ljósareyðum, ljósagrønum og ljósabláum. Sjálvt um grágrønu líðirnar í støðum sýnast heystkendar, tykist ljósið vælgerandi várligt í hesum litríku myndunum.

Fríða Matras Brekku

Rúm og ótálmaðar blómur

Framsýningin letur jú upp dagin eftir valið og tá er upplagt at framsýna verkið hjá Marius Olsen av Tinganesi við blonkum flaggdúki. - Í skrivandi stund vita vit ikki hvør fer at ráða fyri borgum komandi 4 árini. Tvey av teimum, sum arbeiða fast í Steinprenti eru við á framsýningini. Tað eru Louise Aakerman Nielsen og Fríða Matras Brekku. Fyrrnevnda hevur í mong ár savnað saman eitt myndasavn úr bløðum og tíðarritum, sum hon tekur útgangsstøði í. Í onkrum førum snýr tað seg um kollasjur, ið eru yvirførdar til litografiska steinin. Hetta úrslitar í spennandi grafiskum verkum við fáum litum við denti á huglagið í rúmum, sum eisini ofta eru merkt av myndum í myndunum. Fríða Matras Brekku sýnir fram fínar smáar litblýants- og vatnlitsmyndir av fuglum og blómum við hópin av detaljum og litbrigdum ikki minst í litríku tulkingunum av irisblómuni, ið tykjast merkiliga afturhaldandi og ótálmaðar í senn. Tey flestu av teimum framsýndu verkunum eru grafisk verk, men nøkur undantøk eru sum hesar hjá Fríðu.

Hanni Bjartalíð

Hanni Bjartalíð framsýnir eisini nakrar einastandandi fínar tekningar og relieff við eini ørgrynnu av áhugaverdum staklutum og myndum í myndarúminum. Her gløða og brenna litirnir upp móti hvørjum øðrum, so at áskoðarin verður í ørviti. Alt er dekorerað, alt eru mynstur, alt er list t.d. í tekningini ovast av einum reyðum rúmi, sum í sjávum sær gevur hugasamband við Strindberg og Matisse, ið báðir gjørdi hvør sítt slóðbrótandi reytt rúm sum skaldsøgu og mynd. Vindeygað í tekningini hjá Hanna fær teg at hugsa um bæði Van Gogh og Gauguin ella kanska um okkurt symbolistiskt verk hjá Ferdnand Hodler. Kortini er hetta totalt Hanni Bjartalíð uppá allar møguligar og ómøguligar mátar. Aftanfyri skenkin sæst yvir á eitt verk hjá honum uppi yvir eini grønari plantu. - Tey eru heilt framúrskarandi hesi nýggju verkini og eg haldi, at jú fleiri litir og detaljur eru í verkunum hjá hesum listamanninum, tess meira átrokandi gerst tómleikin, mørkini, kanturin og avgrundskenslan. Aftaná øll tingini, hvat er so eftir? Restir til onnur at rudda upp. Relieffini eru eitt sindur meira einføld, men eru kortini merkt av somu kenslu av horror vacui við hópin av staklutum, ið verða sett upp móti eksistentiellari tyngd.

Jólasiðir í Steinprenti

Á hvørjum ári verður tað serliga jólatræið tikið fram, sum Louise Aakerman Nielsen hevur gjørt burtur úr strimlarestum frá prentarbeiðnum. Tað plagar at vera hugnaligt – eisini at síggja teir tríggjar vísu menninar í andlitinum á Peter Carlsen, ið sum siður er, er partur av framsýningini. Harumframt verða verk at síggja hjá Lív Mariu Róadóttir Jæger, Bárði Jákupsson, Tróndi Patursson, Bruno Kjær, Claus Carstensen, Tóroddi Poulsen og Karen Bohøj.

Marius Olsen

Louise Aakerman Nielsen

Bruno Kjær

Fríða Matras Brekku