VÁRFRAMSÝNINGIN 2015
/
Sambært fyrireikarunum fara tey at skipa fyri kunstnarasalong á teirri 25.Várframsýningini, ið verður á Listasavni Føroya 10.apríl-3.mai í ár. Innlatingarfreist: 22. mars 2015. Várframsýningin er ein sokallað "sensurerað" framsýning.
Eitt eyðkenni við Várframsýningini er, at tað altíð er ein nevnd, sum skipar fyri og velur út verkini til framsýningina. Hetta fyri at geva listafólkunum møguleika fyri at hyggja at, og meta um verkini hjá hvørjum øðrum.
Tískil verður, sum nakað nýtt, í ár eisini skipað fyri "salong" í samband við Várframsýningina. Hetta er eitt tiltak fyri luttakandi listafólk, har ið nevndin greiðir frá teimum valunum tey hava tikið fyri Várframsýningina 2015, og samstundis fáa listafólkini høvi at kjakast um verkini, ið eru við á framsýningini.
Úvalsnevndin fyri Várframsýningina 2015 er:
Ole Wich
Sigrun Gunnarsdóttir
Jóhan Martin Christiansen
---
VEGLEIÐING FYRI INNLATING AV VERKUM TIL METINGAR:
HVØR KANN LATA VERK INN TIL METINGAR Á VÁRFRAMSÝNINGINI 2015?
Ein og hvør kann lata verk inn til metingar, bæði einstaklingar sum bólkar eru vælkomin at lata verk inn.
NÆR ER UMSÓKNARFREIST?
Innlating av verkum gongur fyri seg umvegins teldupost, tað vil siga við digitalari domumentatión av verkunum. Hetta skal latast inn í seinasta lagi sunnudagin 22. mars 2015.
Sendast skal til hendan t-postin: varfram@gmail.com
HVUSSU NÓGV VERK KUNNU LATAST INN?
Tað ber til at lata í mesta lagi 10 verk, líkamikið hvør tøknin er.
Fyri hvørt verk skal í mesta lagi latast inn 4 myndir. Eitt videoverk ella líknandi verk, kann eisini latast inn sum ein leinkja til heimasíðu ella líknandi. Tó skal tað vera heilt greitt hvat verk verður latið inn til metingar. Verkini skulu ikki vera eldri enn 2 ár.
HVAT SKAL LATAST INN SAMAN VIÐ VERKUNUM?
Verkini skulu latast inn umvegis teldupost. Hvørt verk (fíl) skal vera navngivið við navni á listafólki og nummari. Umframt hetta skal latast inn:
1) Ein greiður listi við nummari á verki og tilhoyrandi heiti, ár, stødd/longd, nøgd/upplag (til dømis í samband við grafisk verk, foto, video osv.), tilfari, prísi og annars onnur viðkomandi informatión.
2) Ein listi við navni á listafólki, telefonnummar og t-post.
3) Eventuelt stutt fágreiðing (okkurt um 5-10 linjur) um tankarnar handan verkini. Legg til merkis at dokumentatiónin/fotomyndirnar skulu vera av nóg høgari góðsku so at nevndin ikki er í iva, hvussu verki sær út!
NÆR OG HVUSSU FÆR EIN BOÐ UM VERKINI ERU VIÐ Á FRAMSÝNINGINI ELLA IKKI?
Avgerðin hjá nevndini verður send út umvegis t-post, sum er nevnd á listanum, sum verður sendur við verkunum. Umsóknarfreistin er 22. mars 2015 og svar verður sent út í seinasta lagi eina viku seinni.
UM EITT VERK VERÐUR VIÐ Á VÁRFRAMSÝNINGINI, HVØR STENDUR SO FYRI UPPHEINGING OG LÍKNANDI?
Nevndin fyri Várframsýningina stendur fyri hesum, og hevur fullan rætt til at disponera yvir framsýningini og hvussu verk verða hongd upp.
HVUSSU ER VIÐ TEKNISKARI ÚTGERÐ?
Listafólki skal lata tekniska útgerð inn saman við verkinum. Set teg í samband við nevndina frammanundan umsóknarfreistina um neyðugt.
NÆR OG HVAR SKULU ÚTVALD VERK LATAST INN?
Um tíni verk verða útvald til Várframsýningina 2015 skal hetta latast inn á Listasavni Føroya mánadagin 6. apríl 2015.
Listafólki stendur sjálvt fyri flutningi av verkunum, bæði til og frá Listasavni Føroya.
Verkini eru tryggjað meðan tey verða sýnd fram í Listasavni Føroya 7. apríl - 4. mai 2015
UM EITT VERK VERÐUR SELT?
Verður eitt verk selt, verður 20% av prísinum á verkinum latin til Føroysk Myndlistafólk. Tískil skal hetta verða íroknað prísinum, sum stendur á listasum, sum verður latin inn við verkunum.
Peningurin verður útgoldin, tá ið keypari hevur goldið alla upphæddina til Føroysk Myndlistafólk.
ØLL VERK SUM IKKI VERÐA SELD, SKULU AVHEINTAST Á LISTASAVNI FØROYA, TÁ IÐ FRAMSÝNINGIN LATUR AFTUR, Í SEINASTA LAGI MÁNADAGIN 4. MAI 2015!
Um tú hevur narkar spurningar viðvíkjandi Várframsýningini 2015, ert tú vælkomi at seta teg í samband við okkum á:
varfram@gmail.com
---
Vinarliga heilsan
Nevndin fyri Várframsýningina 2015