Ótroyttiligi tónleikagranskarin
/Mynd: in.fo
Skrivað hevur: Leif Hansen
Marianne Clausen (1947-2014)
3351 løg eru fest á blað og útgivin. Í sær sjálvum er hetta at rokna sum eitt roysni og av ómetaligum stórum týdningi fyri framtíðar gransking í evninum. Tað fyriliggja nú í fýra snotiligum bókum eitt stórt úrval av lagatilfari, sum ikki var lætt atkomuligt áður. Fyri stuttum lat Marianne so enn eina bók úr hondum, har hon savnaði tilfar úr teimum fyrstu bókunum í einum bindi. Marianne hevur verið ígjøgnum nærum allar kendar upptøkur av føroyskum fólkasangi og við stórum hegni skrivað niður á blað eitt breitt úrval av løgunum.
Nótaskriftin hevur sínar avmarkingar og langt kann sum kunnugt verða millum klingandi sálmasang, kvøðing ella skjaldrasang og nótablað. Innan tónleikaetnologiina er trupulleikin við transkriptión av slíkum slag vælkendur. Transkriptiónin verður ongantíð objektiv, men fer altíð at bera brá av tulking hjá tí, sum skrivar niður. Ein niðurskrift verður tí einans ein lýsing av einum lagi, og hvussu ávísi sangarin framførdi tað tá upptøkan varð gjørd. Vit fara heldur ongantíð identiskt at kunna framføra føroyskan dans, sálmasang ella skjaldur bara út frá nótunum. Verða løgini á nóta tiknin út úr rætta kontekstinum eru tey neyvan at kenna aftur. Men transkriberaðu løgini loyva okkum hinvegin at studera hetta ovurhonds stóra lagatilfar. Uppskriftirnar gevur okkum eina góða peiling av tónleikaliga innihaldinum, rytmu og tónalitet í løgunum. Við einum so royndum og nærlagdum nótaskrivara sum Marianne Clausen var, kunna vit verða vís í, at vit við teimum avmarkingum, sum liggja í nótaskrift, neyvan sleppa nógv nærri tónleikakelduni. Ótroyttiligi tónleikagranskarin gjørdi eitt megnar arbeiði, til gleði og gagns fyri framtíðar tónleikarar og ikki minst tónleikagranskarar.