Mentanarárið 2014

Tóroddur Poulsen: Tøgn (2010)

Tóroddur Poulsen: Tøgn (2010)

Gott nýggjár, kæru lesarar og skrollarar, og túsund takk fyri tað farna. Listaportalurin er nú næstan hálvt ára gamal, hann er neyvan komin til grulvistadiið, men eftirsum áhugin fyri list og mentan økist støðugt, so haldi eg fram eisini í 2015 í framhaldandi samstarvi við Dimmalætting. Steinprentið omanfyri gjørdi Tóroddur Poulsen í 2010, men eg brúki øll høvi at draga hesa herligu myndina fram. Akkurát hetta høvið er í grundini ikki serliga sannførandi, tí í kringvarpssendingini “Mentanarárið 2014” er lítil og eingin tøgn. Hinvegin er tað kanska tað, sum ikki verður sagt, ella tað, sum lítið verður sagt um, sum er serliga áhugavert í sendingini, t.d. viðvíkjandi LUDO hjá Katrini Ottarsdóttir, sum eg sjálv helt vera eitt hæddarpunkt í filmsárinum 2014, men sum eg hoyri viðgjørdan eins og eitt ella annað uttanfyristandandi ískoyti. Tað eru teir báðir, Pætur M.Dahl og Birgir Kruse, ið práta og teir fegnast um gongdina innan føroyskan filmsgerð. Fyrrnevndi tosar m.a. um týdningin av at hava eina føroyska filmsframleiðslu á sama hátt sum Heiðrikur av Heygum hevði tað, tá hann gjørdi “Skuld”. Bókmentafrøðingarnir Bergur D.Hansen og Vár í Ólavstovu staðfesta, at tað vóru Carl Jóhan Jensen og Tóroddur Poulsen, sum við bókunum “Eg síggi teg betur í myrkri” og “Rustur sum viður og vindur” borðreiddu við ársins bókmentaligu hæddarpunktum. Bergur D.Hansen hevur eina sera áhugaverda lýsing av prosabókini hjá Tóroddi Poulsen, har hann kemur inn á tær mongu røddirnar og tekstasløgini í prosabókini. Yrkingarnar frá í ár eru eitt sindur siðbundnar, verður ført fram – ikki eitt kis um yrkingarsavnið hjá Kim Simonsen, sum vann M.A.Jacobsen, men tað er nú eisini frá 2013. Leiklistafrøðingarnir, Vár Berghamar Jacobsen og Sóley Danielsen tosa nógv um útjaðara og um fólksligheit, meðan minni verður tosað um t.d. linjuna hjá Tjóðpallinum og tey stóru leiklistaverkini í árinum ið fór, Sóley Danielsen sóknast eftir meira lættisoppa á Tjóðpallinum, eg ógvist, men eg eri sjálv við í sendingini. Vit tosa um myndlist og eg ivist ikki í, at har er okkurt spennandi, sum eg ikki sigi, sjálvt um eg ikki havi uppdagað tað enn. Sum tit hoyra í sendingini, eri eg av hjarta samd við leiðara Listasavnsins, Nils Ohrt í, at ársins listaframsýningaruppliving er framsýningin hjá Hansinu Iversen í Listasavninum, “Anything is a mirror”. Í Dimmalætting í morgin er meira um listaárið, ið fór.

Hoyrið sendingina her:

http://kvf.fo/netvarp/uv/2014/12/31/mentanarri-2014