Edward Fuglø fekk Listavirðisløn Nólsoyar Páls

Tað var Edward Fuglø, sum fekk ársins Listavirðisløn Nólsoyar Páls, sum Klaksvíkar Kommuna letur fyri aðru ferð, greiðir Norðlýsið frá. Jógvan Skorheim, borgarstjóri handaði heiðurslønina, sum m.a. segði um Edward Fuglø: Listamaðurin, ið vit heiðra í kvøld, hevur ferðast frá einum listarligum útjaðara – einum orginalum og kanska eisini marginalum umhvørvi – og inni í hjørtuni á føroyingum og í miðdepilin í føroyskari list. Á ferðini hevur hann verið trúfastur ímóti sínum hugskotum og sínari lívs- og listafatan. Hansara orginalu hugskot eru við tryggum handverki, gløggum eygleiðingum og einum góðum eyga blivin til nýskapandi list á høgum altjóða stigi.

Hann hevur verið við í listarligum arbeiði í øllum hugsandi listagreinum. Hann hevur skapt listaverk á lørifti, veggjum og aðrastaðni, hann hevur lagt til rættis pallsetingar og búnar í sjónleiki, í filmi og í framførslum av ymsum slagi, hann hevur skrivað og teknað heiðursløntar barnabøkur, og hann mann hava ráðgivið mongum leikum og lærdum um samansetingar av litum, vali av tilfari og skapan av viðkomandi úttrykki.

Listamaðurin hevur eisini varðveitt lokala umhvørvið sum sítt umhvørvi. Hann kendi seg ikki noyddan at leita burtur fyri at kunna skapa og úttrykkja seg. Hann hevur ikki kent seg avmarkaðan her millum Kjølin og Háfjall, millum Myrkjanoyrafjall og Klakkin. Tá ið summi kunna halda nærumhvørvi verðaavmarkandi og trongligt, hevur listamaðurin fevnt sítt lokaløkið. Hann hevur ávirkað tað, verið við til at broyta tað, gjørt tað meira spennandi og skapandi, og hann hevur brúkt tað til íblástur og útgangsstøði í sínari list.

Í søguríka umhvørvinum Úti í Klaksvík hevur hann bæði við sínum heimi og atelieri og í gamla Einahandlinum verið við til at fáa nýtt lív og innihald í økið, sum hevur havt so stóran søguligan týdning fyri býin. Eisini í hesum samanhangi eiga vit at veita listamanninum stóra tøkk fyri hansara innsats og avrik – og vit eru sera fegin um, at hann hevur valt sær lokalumhvørvið at virka út frá – sjálvandi altíð í samspæli við útheimin og altjóða umhvørvið.

At hann hevur tikið eina ferð úr einum minni umhvørvi og inn í føroysku hjørtuni og fólkasálina sæst millum annað aftur í, at hann ferð eftir ferð verður biðin um at gera list til skúlar og aðrar bygningar. Hann var eisini kosin at skapa almennu føroysku gávuna til Margrethu Drotning, tá ið hon hátíðarhelt 40 ára dagin sum drotning. Við framúr góðum barnabókum hevur hann skapt ein spennandi og hugtakandi heim, sum bæði smá og stór kunnu leita inn í og fáa gleði burturúr. Og beint omanfyri vegin her – í kjallaranum í Christianskirkjuni hevur hann saman listahandverkara skapt eitt stórverk við grundarlagi í søguni um Jesus..."

Greinin stendur í Norðlýsinum og har eru fleiri myndir frá tiltakinum:

http://www.nordlysid.fo/edvard+fuglo+fekk+mentanarheidurslon+nolsoyar+pals.html